प्रधानमन्त्रीको दोहोरो चरित्र, आफु बढाउने व्यवसायीलाई दबाब दिने

काठमाडौ, भदौ १८–आखिर सरकारले पेट्रोलियम पदार्थको मूल्य बढाइहाल्यो । अन्तर्राष्ट्रिय बजारमा मूल्य बढेको भन्दै यो सरकारले सबै पेट्रोलियम पदार्थको मूल्य बढायो । कम्युनिस्ट प्रधानमन्त्री भएको बेला निम्न र मध्यमवर्गलाई मारमा पर्ने गरी मूल्य बढाएको छ । निगमले आइतबार रातीदेखि लागु हुने गरी पेट्रोल, डिजेल, मट्टितेल र हवाई इन्धनको मूल्य बढायो । पेट्रोलमा ५ रुपैयाँ ,डिजेल र मट्टितेलमा ४ रुपैयाँ र हवाई इन्धनमा ११ रुपैयाँ मूल्य बढाएको छ भने एलपी ग्यासमा एक सिलिन्डरमा ५५ रुपैयाँ मूल्य बढाएको छ ।

 सरकारको मूल्यवृद्धिले आम जनतालाई थप आहत बनाएको छ । जनताको आयस्रोतमा कुनै सुधार भएको छैन । पूर्ण बजेट नआउँदा सरकारी कर्मचारीको तलब पनि बढेको छैन । सरकारले खाद्यान्नको मूल्यवृद्धि नियन्त्रण गर्न सकेको छैन । खाद्यान्नको मूल्य बढेको बढ्यै छ । प्रधानमन्त्री बाबुराम भट्टराई मूल्य घटाउनको लागि दैनिक रुपमा निर्देशन दिन्छन् । तर आफै भने सरकारको स्वामित्वको आयल निगमलाई तेलको भाउ बढाउन निर्देशन दिन्छन् ।

 आइतबार उनले वाणिज्य तथा आपूर्ति सचिव लालमणी जोशी र निगमका कामु कार्यकारी निर्देशक सुरेशकुमार अग्रवाललाई बोलाएर भाउ बढाउन निर्देशन दिए । तेलको मूल्य बढाएपछि खाद्यान्नको मूल्य घट्ने होइन बढ्छ । अब झन् जनताले महँगोमा खाद्यान्न किन्नुपर्नेछ । किनकी डिजेलको मूल्य बढ्ने वितिकै ढुवानी व्यवसायीले भाडा बढाउनेछ । यो भाडा बढेपछि खाद्यान्नको मूल्य बढ्छ ।